【明報專訊】今年1月港府宣布同內地逐步通關，到2月恢復免檢疫通關，旅遊業開始復常，而旅發局噚日就公布，今年3月初步訪港旅客數字有245.4萬人次，按月升68%。開關首3個月共錄得約441萬旅客人次訪港，相等於2017至2019年每季平均旅客量約三成。
3月訪港客245.4萬人次 月升68%
Emily用疫情前2019年1月至3月嘅訪港數字同今年同期比較（見表），前者約1823萬人次，計番今年首季數字，只佔疫情前約兩成。
旅遊界立法會議員姚柏良話香港同內地全面通關後，訪港旅客有上升趨勢，形容係可觀嘅情况。佢又話本港展覽業開始復蘇，留意到多咗商務旅客來港，但佢就話觀光客未見回升，加上𠵱家本港航班運力只恢復五六成，海外訪客數字自然係少啲。
旅遊促進會總幹事崔定邦就認為，今年首季嘅訪港訪客數字符合業界預期，但仍需要約兩年嘅時間先可以回復到疫情前水平。佢又話，疫情前內地旅客數字佔整體七成幾，而今年首季嘅內地旅客都係佔約七成，「佢哋來港方便過海外旅客，消費力較高，所以佔多數係正常」。
