【明報專訊】今日係全民國家安全教育日，各處都有相關活動。噚日元朗警區就率先同世界雙節棍總會（香港分會）合作，透過集體玩雙截棍，宣傳國家安全。大會話今年係李小龍逝世50周年，舉辦呢次活動，以耍雙節棍作紀念，而活動又可以推動長幼共融，參與者6歲至80歲都有，有超過6間中小學參與，當中包括非華語學生。
活動喺西九文化區舉行，一眾參加者喺草地上揮動海綿雙截棍，現場有人帶領學生高嗌「國家安全，護我家園」口號。
保安局長鄧炳強、教育局長蔡若蓮都有參與活動，而民建聯立法會議員周浩鼎都有露兩手，之後仲喺facebook發表感想，話古時用作守城嘅工具，𠵱家就寓意守護國家安全。蔡若蓮都有出帖，話今次活動傳承中華武術國粹，傳遞守護國家安全信息。
相關字詞﹕國家安全教育日
