宋宛穎亂跳冇章法，勝在笑容搭夠。
無綫全新綜藝真人騷《魔音女團》正式首播，16位練習生各出奇謀應付嚴格考核，自認冇記性的宋宛穎雖然亂跳一通，但靠執生獲高度評價；倪嘉雯則使出表情包讓人留下深刻印象。
16位「魔音」練習生要於短短3星期內接受連串特訓及考驗，爭奪「魔音女團」最終6個席位，眾人要在限時兩小時內，跟排舞老師即學即跳30秒K-Pop勁舞，隨後輪流上台Solo接受考核，讓節目主持、班主任和排舞老師評分，相當刺激。
自嘲冇記性的宋宛穎，大部分時候雖然是「自創舞」亂跳一通，但因識執生獲高度評價，班主任陳潔靈說：「鍾意佢有笑容，咁慌亂仲做到。」主持蕭正楠說：「呢個就係臨場執生嗰樣嘢！」另一練習生盧映彤則憑厚面皮取勝，排舞老師Geon說：「雖然有啲位跳錯，但因為你厚面皮繼續跳落去，所以睇你表演幾有趣。」
倪嘉雯「表情包」得歡心
向來被睇高一線的倪嘉雯亦相當搶鏡，雖然考核期間信心不足，全程以搞怪表情來「完成」表演，不是皺眉、苦笑就是天然呆，相當可愛，令Geon留下深刻印象：「淨係記得你呢個動作，因為你個笑容。」又給予鼓勵：「同其他同學比，你算係記（舞蹈）得唔錯㗎喇！」至於被視為大熱門之一的莊子璇，在首輪考核中滑鐵盧，令排舞老師也替她捏一把汗：「每次睇你都會戥你感到不安。」並指出她要改善的地方：「你嘅視線成日都會望住個地下。」
莊子璇即學即跳，表現略欠自信。
