女團 XiX 將於7月18日在西九文化區首次舉行個唱「Backyard Live: XiX 『微笑擊敗全世界』」。為籌備演唱會，眾成員表現得非常興奮，Crystal更笑言「絕食」上陣：「今次係我哋 XiX 第一次開騷，所以大家都緊張到『爆炸』，我最擔心到時啲衫會點、會唱咩歌等等。為咗保持完美聲線， 𠵱家開始要戒零食，務求到時以最佳狀態見大家。」
另一成員Charlotte指為演唱會搏命練習：「因為我擔心現場會緊張到腦海一片空白，所以要搏命練習，希望上到台所有嘢都可以順順利利，總之所有影響演唱會表現嘅因素，我都會超級小心準備。」Kiele表示唔敢放鬆，要「寫稿」為眾隊員度對白：「因為佢哋成日亂講嘢，有時站在台上唔知講乜嘢，我真係懷疑當日會發生呢一啲情況，都係寫清楚『對白』給大家，如果唔係真係控制唔到台上會發生咩事。」Caitlin和Kiele都表示忙「撲飛」，未開售已處理票務：「因為我哋係組合，內部啲飛都唔夠，我哋問緊有冇方法買多啲，點知經理人叫我哋自己上網搶。」
