【時報訊】解放軍駐港部隊噚日喺香港市區演練，出動海陸空部隊組織聯合巡邏，重點訓練部隊嘅快速策劃、緊急出動、特情處置、聯合行動等方面嘅作戰能力，又話過程中有嚴格遵守香港嘅道路、航道同航空管理等方面嘅法律規定，亦有事先通報政府有關部門。見駐港部隊發放嘅相片，多艘戰艇及直升機喺維港巡弋，有大批裝甲車喺公路上行走。
翻查資料，近幾年駐港部隊都有類似巡邏，例如上年7月都有出動武裝直升機喺市區上空巡邏，並喺南丫島對出嘅下尾灣海域模擬搜救海上失事人員、截查可疑船，模擬清剿闖入民居嘅恐怖分子同救屋內人質。
新華社噚日報道，駐港部隊出動咗海陸空部隊部分兵力，包括有高機動步兵、艦艇、直升機等多個兵種，按實戰化要求主要演練指揮所開設及籌劃指揮、海空巡邏、攔截查證、陸空巡邏、戰場救護等內容，亦希望透過實戰訓練部隊嘅指揮、通聯同協同能力，提升部隊籌劃指揮同聯合行動嘅能力。
