【時報訊】和富社會企業「香港開心D」等團體今年7月喺網上訪問1283人，調查結果顯示「香港整體開心指數」創2018年以嚟新低，滿分10分，僅得5.88分；其中24%受訪者覺得自己「不開心」（0至4分），比例較舊年同類調查多一成。
調查喺7月18日至23日進行，結果亦顯示有16.8%受訪者幾乎每日感覺疲倦或無活力；12.8%幾乎每日入睡困難、睡不安穩或睡眠過多；10.9%幾乎每日做嘢都提唔起勁或無樂趣。而受訪者對外在環境嘅滿意度亦下跌，跌幅最大嘅環境因素依次係「居住環境」、「治安」、「自己的住屋狀况」同「公共醫療」。
調查反映照顧者、待業者同青年嘅精神健康最差，其中照顧者嘅精神健康為5.31分；18歲至24歲青年5.26分；待業者只有4.83分，比一般人嘅平均分5.67低。香港開心D聯席主席狄志遠認為，政府需要大力推動「身心靈健康經濟」，重點關注以上3種人，又話樂見政府推廣「夜經濟」，但提醒無論推動咩活動，最重要都係市民感到幸福，先至會樂於消費。
