【時報訊】香港愈來愈多人養寵物，不過並非所有地方都容許市民攜帶寵物內進。恒生銀行喺銅鑼灣設立全港首間寵物友善嘅銀行分行，客戶可以帶埋寵物一齊到分行處理銀行事務。恒生話希慎道分行屬於寵物友善分行嘅試點，未來會推出更多創新服務同產品。
恒生首間寵物友善分行位於希慎道，分行大堂同優越理財中心大堂均設置「寵物友善等候區域」，內有寵物專用嘅垃圾桶、空氣清新機、濕紙巾等，客戶可以同寶貝喺區域內等候，寵物亦可跟隨客戶到寵物友善會議室處理銀行事務。寵物友善分行特別採用對寵物無害嘅清潔劑，確保毛孩嘅安全。
寵物友善政策都係商機，恒生早前做過客戶調查，話訪問超過200名30至64歲並持有100萬元或以上流動資產者，當中有關毛孩飼養方面，每4名受訪者就有1人現正飼養或有計劃未來半年飼養貓或狗。
