為紀念一代巨星張國榮70歲誕辰，樂壇老中青歌手雲集在西九舉行的音樂會。全晚最感動一刻是歌神許冠傑相隔34年跟故友隔空對唱《沉默是金》，並改寫《難忘你》部分歌詞作致敬，情義之深令人動容。有份演出的莫文蔚及MIRROR成員陳卓賢，亦以歌聲表達對偶像的敬愛。
前日是「哥哥」張國榮（Leslie）70歲誕辰，來自港澳、內地、日本、韓國、新加坡、英國及印度的「哥迷」，前晚逼爆西九文化中心欣賞無人機匯演，而重點節目是假竹翠公園舉行的《繼續寵愛．張國榮70誕辰．音樂會》。參與是次演出的歌手多達15位，包括跟哥哥亦師亦友的殿堂級歌手許冠傑（阿Sam）、天后莫文蔚、張衞健、鍾鎮濤及女兒鍾懿、MIRROR成員陳卓賢（Ian）、譚耀文、陳松伶、陳潔靈、蘇永康、謝天華及後輩歌手黃洛妍、甄敏芳、馮熙燮及顏米羔，卡士強大，連哥哥生前摯愛唐鶴德（唐唐）亦有「獻聲」。
歌神阿Sam激罕在港露面，並捨棄他至愛的豹紋Look，穿上粉紫色西裝壓軸登場，全場即時起哄。78歲的他聲如洪鐘，表現精靈，他自彈自唱經典作《沉默是金》時，大屏幕播出哥哥的演出片段，打造兩人隔空對唱的世紀場面，他更為作品《難忘你》編上新歌詞，表示：「改咗少少歌詞向哥哥致敬，首歌叫做《難忘你Leslie》。」而他唱到《有誰共鳴》中段時，全體歌手齊集台上大合唱，氣氛感人。哥哥和阿Sam最後一次同台演出，是1992年初舉行的《許冠傑光榮引退匯群星》晚會，當時已「封咪」3年的哥哥為撐偶像兼好友，特別破戒登場跟阿Sam合唱《沉默是金》。
莫文蔚難忘初見面
天后莫文蔚當年7歲時在亞洲歌唱大賽向哥哥獻花，亦曾擔任哥哥經典作《偷情》及《紅》的MV女主角及演唱會嘉賓，前晚她身穿白色服飾，頭戴紅色帽獻唱哥哥當年參賽的歌曲《American Pie》，又唱出《何去何從》及《偷情》，她表示：「我一定係鍾意咗哥哥最耐、最耐嗰個，係超級Fans，因為係49年前，即係1977年。」她憶述一身白色造型的哥哥令人驚艷：「好震撼，雖然當時好細個，但已經喺心裏面問，呢個係咪傳說中嘅白馬王子？點解可以咁靚仔、咁有型？由嗰刻開始就記住咗張國榮呢個名。」她指在奇妙的緣分下，入行後結識到哥哥，更有幸被視為世姪女，獲得不少教導、愛錫及照顧：「佢吩咐我一定要叫佢做Uncle Leslie，好掛住你！」
至於Ian雖然無緣認識哥哥，但亦向前輩獻唱《I Honestly Love You》，他說：「每次聽到佢嘅電影主題曲，腦海就會浮現嗰套電影嘅畫面。由細到大都聽到哥哥點樣為我哋呢個地方、行業付出咗好多，好照顧同僚，佢係一個好值得學習嘅對象，相信唔只我哋呢代聽哥哥嘅歌同睇佢嘅電影長大，希望我嘅下一代都會咁做。」
唐唐毋忘摯愛：心意從未改變
譚耀文則分享跟哥哥的一面之緣，難忘獲送上終身受用的金句：「佢同我講有睇我演出，叫我繼續加油，記住要不斷學習、提升自己，我哋會遇到好多難關，要逐一克服，千祈唔好咁容易放棄，要先對人好，人哋先會對你好，就係呢幾句說話一直支撐住我。」事隔幾年後，已不再是歌手的他接到電話，原來是哥哥透過經理人請他睇告別演唱會，他又表示正是其師傅、已故天后梅艷芳介紹他認識哥哥。
音樂會結束前，台上大屏幕播出唐唐的錄音：「大家好，我哋喺呢度祝佢生日快樂，已經過咗咁多年，Leslie一啲都冇變，仲係咁帥氣、咁迷人，佢嘅電影依然咁好看，佢嘅歌曲依然咁好聽。改變嘅係我哋，慢慢變老咗，滿頭白髮、滿面皺紋，但我哋對佢嘅心意從未改變，依然掛念哥哥，依然疼愛哥哥，我哋一齊繼續寵愛張國榮，Leslie，Happy Birthday！」
