葉蒨文、林子祥與陳奕迅合唱，全場歌迷High爆！
藝人林子祥（阿Lam）與葉蒨文（Sally）的紅館《白頭到老WE ARE ONE世界巡迴演唱會–香港站》反應甚佳，二人又跳又唱，而前晚第4場更變成生日派對，全場8000觀眾齊齊為78歲的阿Lam賀壽，而阿Lam的兒子林德信更偕妻女上台，Sally哽咽再送上大驚喜：「個女April啱啱喺美國飛返嚟！」令阿Lam驚喜萬分，父女相擁，流下男兒淚，場面感動，阿Lam又向Sally送上一吻，甜到漏。
葉蒨文大讚乖仔
前晚吸引不少圈中好友前來欣賞，當中包括張艾嘉、洪金寶及太太高麗虹、曾志偉、黃博、炎明熹等，而陳奕迅（Eason）更帶埋媽媽睇騷，期間被阿Lam及Sally叫上台合唱，Eason表示全晚喊了多次，第一個喊位是看到二人唱《十分十二吋》時，他說：「見到你哋好努力，I’m so touching…」阿Lam與Sally卻笑謂：「我以為佢話『我覺得你哋好老……』」Eason即笑住耍手。他們於台上中英夾雜交流，Sally讚Eason乖仔：「佢都帶佢阿媽嚟，佢好乖呀！」而戴上眼鏡的Eason搞笑摸着頭髮，嫌未有Set造型：「我個頭好扁呀！」又引來現場一陣笑聲。之後3人合唱《數字人生》，Eason唱到揈晒腳，由於歌曲節奏是愈唱愈快，唱完後，Eason也單膝跪地、甘拜下風，並問：「你哋係點做到？」十分搞笑。
而日前的另一場演出上，阿Lam表示於紅館唱了50年，隨後唱出《每夜唱不停》，之後緊接翻唱Beyond的《海闊天空》時唱到哽咽，感動全場歌迷。
