鄭秀文（Sammi）前晚在啟德主場館舉行的第二場「答謝會」，由丈夫許志安擔任表演嘉賓，許生許太手拖手合唱《一步一生》和《其實你心裏有沒有我》，擲下粉紅色震撼彈。
Sammi坦言被通知演唱會延期後感到前所未有的考驗，她選擇積極面對，說：「今次一連三晚『答謝會』對我嚟講相當特別，我諗對於現場嘅觀眾都係一個好大嘅體驗，所有嘢都好突發，所有嘢都好突然。開show前幾日收到消息，一切叫『停』，呢個『停』字相當之重。之前我做咗好多準備，團隊亦都預備咗好多精彩、好多嘢睇嘅production（製作）。既然上天畀咗呢個考驗我，我就接受佢，用好正面、積極嘅態度接受佢！」
然而她自覺需要更大的力量來陪伴，說：「原本今晚喺真正嘅演唱會上係冇任何嘉賓，但發生呢件事，我覺得今晚喺呢個舞台上，我好想有一份更加大嘅力量畀自己，因為呢幾日走過來確實好唔容易。前幾日我同呢個人講『你可唔可以嚟做我嘅嘉賓啊？我記得有一年喺紅館，開開吓演唱會冇晒電嘅時候，我叫救命，第一個諗到你，所以今次好想有呢份力量幫我去度過。』」音樂奏起《一步一生》，許志安升上台，全場歡呼。
安仔邊唱邊一步步走近伸展台中間的Sammi，而Sammi亦向他行過去，她接着唱：「沿途就算跌，要跌得好看，才能不自責，報答別人厚望，然而誰明白我沒你們所想的堅壯，我很想找個人，對我說別怯慌。」她肉緊地握着拳頭，歌詞似乎篤中她的心聲。他們四目交投，盡在不言中，安仔手拖Sammi，給予她最大和最溫柔的力量，全場再次尖叫。
唱畢，Sammi對安仔說：「多謝你！前幾日，臨時臨急問你可唔可以陪我企喺呢個台？因為今晚第二晚，我好唔想自己一個人。於是我通知公司，可唔可以臨時加個嘉賓？因為原來有好多嘢搞，要買保險，都整得切，幫你買咗保險。」觀眾被Sammi的反差萌逗得爆笑，安仔就一直甜笑望着太太。
黃子華任尾場嘉賓
至於昨晚尾場，Sammi邀得電影《夜王》拍檔黃子華擔任嘉賓。子華妙談Sammi今次「答謝會」的意義，並指現場粉絲應為今次「答謝會」支付半價。
