【Emily】食雲南「魔幻菇」耶倫令京食店熱爆

【時報訊】美國財長耶倫（Janet Yellen）上月訪華時，第一餐就喺北京三里屯餐廳食雲南菜，其中一道菜係牛肝菌「見手青」，引起內地網民熱議，原因係呢種菇如果處理得唔好，有可能引致幻覺甚至中毒。耶倫最近受訪，講番呢段食「魔幻蘑菇」嘅經歷都忍唔住笑，話後來先知呢種菇可引致幻覺。

耶倫喺美國有線新聞網絡（CNN）節目上話，留意到內地對食菇事件嘅討論，但知道如果「見手青」烹調得宜，就唔會有任何幻覺，而當日一行人食完都無唔舒服，亦好享受呢餐飯。

耶倫去嘅餐廳「一坐一忘」本身喺駐華外交官同記者之間薄有名氣，耶倫到訪後更聲名大噪。「一坐一忘」上月喺微博話，耶倫食完飯後，總部嘅宣傳、人力同財務同事已集體「轉職」，變身「削菌工」；餐廳嘅菌類供應商話，本身一車貨夠供應全北京嘅分店，𠵱家一車貨只夠供應三里屯店。