【時報訊】立法會暑假休會，政黨、議員外訪一個接一個，民建聯噚日去珠海考察，參觀位於橫琴嘅「澳門新街坊」項目。項目係澳門政府同珠海市政府喺內地建設嘅首個「澳門社區」，佔地19萬平方米，提供4000個住宅單位出售，售價係橫琴樓價嘅六折，社區內有商舖、學校、衛生站、長者服務中心等。民建聯主席李慧琼參觀後認為項目對香港解決房屋問題有所啟發。
李慧琼關注區內嘅法律同通關問題，並引述珠海市委常委、統戰部長郭才武話，澳門輕軌將來會延伸到橫琴口岸，方便澳門人通關，而整個橫琴嘅經濟發展會由澳門主導，社會管理則按內地標準。
民建聯去完橫琴後，參觀埋珠海空港國際智慧物流園、珠海太空中心，顏汶羽提到，物流園啟用後，年吞吐量達50萬噸，預料近兩個月開始營運，佢認為香港可同珠海探討發展港珠國際貨運業務。
