【時報訊】一連7日嘅書展日前結束，會展管理公司喺今年書展首次推行「綠在會展」廚餘廢物回收行動，美食區同埋參展商用膳區都設置咗廚餘、廢物分類回收桶，總共收集到近2300公斤廚餘，會送去政府屬下嘅廚餘處理設施 O．Park1，轉廢為能。
會展管理公司董事總經理梅李玉霞話，「綠在會展」除咗增加大眾對廚餘分類嘅認識，仲提高咗公司對實踐綠色承諾嘅認同及責任。佢哋由2018年起已經有參加 O．Park1嘅廚餘回收計劃，將會展嘅餐廳、廚房同宴會活動嘅廚餘運送去 O．Park1。上年佢哋仲推出計劃，鼓勵主辦機構同承建商回收包住展覽品嘅塑膠保鮮膜，自2022年7月推出到今年6月尾，已經收到接近4900公斤嘅塑膠保鮮膜。
