【時報訊】公務員事務局長楊何蓓茵率領20多名常秘同部門首長去內地，參加研修課程兼考察，一行人日前轉到浙江杭州，參觀當地「Hello Kitty樂園」，一眾高官見到Hello Kitty都相當雀躍。楊太話唔少女士對Hello Kitty愛不釋手，認為「少女心」唔會隨時間改變，仲話呢份情懷同樣適用於公務員團隊。
考察團到杭州先參觀「Hello Kitty樂園」，楊太喺facebook發文，話一眾女常秘見到Hello Kitty顯得十分雀躍，片段所見，商經局常秘利敏貞等仲同Hello Kitty合照。楊太認為「少女心」有如公務員真誠同始終如一嘅情懷，只要忠誠擔當、恪盡職守，多落區、多提問、多聽意見，就可以制訂符合多數人利益嘅政策。除咗合照，楊太話隨團官員亦關心園區最新發展，從中取經。
