【時報訊】醫務衛生局政治助理祁志鴻（Keith）周一履新，噚日就到立法會同議員、記者打招呼，首次以政助身分現身立法會嘅佢略顯緊張、未有多言，話想先認識傳媒，熟習一下。Keith「轉跑道」前擔任立法會議員簡慧敏嘅助理，再之前幫經民聯林健鋒，簡慧敏話醫衛局長盧寵茂向佢「搶人才」時非常有誠意，仲形容自己係「割愛」。
太太從醫 曾任職公院
Keith噚日仲得到兩名前老闆照顧，林健鋒同簡慧敏都陪Keith遊立法會。Keith話主要想先認識傳媒，雖然卡片未印好，已經攞住二維碼畀一眾記者掃描聯絡方法。不過Keith似乎有啲緊張，被問到近日器官捐贈事件引起爭議，佢回應話要「學習吓先」。
林健鋒無講有冇向政府引薦Keith，但對於Keith係咪熟悉醫療，佢就透露Keith嘅太太係醫生，Keith亦話太太曾經任職公立醫院。簡慧敏亦與Keith一齊同記者打招呼，簡形容其議辦係「少林寺」，如果想加入政府，可以考慮任職議助。前食衛局政助、陳凱欣議員就讚Keith「雙腳踏入綠地氈（立法會走廊）」同傳媒打招呼做得好，又認為醫衛局政助懸空一年，累積好多工作，相信Keith會相當忙碌。
