何雁詩推出新歌自勉。
歌手何雁詩日前接受專訪時，手臂滿布瘀痕，令人擔心她有自殘傾向，她即大派定心丸：「放心，全部都係煮嘢食時唔小心整親啫，唔使驚，我大個女。」談及推出今年第二首派台歌，身兼主唱、作曲及監製3職，問她會否嘗試填詞？她直言：「中文詞就唔好啦，因為我啲中文唔係好得，今次首歌係想用車嚟代表自己，寓意『出得嚟行，無論遇到乜嘢都要頂得順。』」
問到會否考慮跟歌手老公鄭俊弘合作出歌？她即耍手擰頭，覺得雙方在音樂上難合作：「風格唔同，已經係夫婦關係，如果再多埋工作關係，我覺得唔太着數，所以未諗過叫佢同我簽埋一間唱片公司。」至於會否為兒子度身創作歌曲？她同樣抗拒：「佢唔會聽得明，或者等佢大啲會聽得明時再作打算啦！」
