由蔡卓妍（阿Sa）和鍾欣潼（阿嬌）合組的Twins，早前宣布今年12月18日至20日於會展舉行一連三場《Twins Side by Side Concert》Sidetrack演唱會，並且是「香港限定」，絕不巡迴。消息一出，門票於優先訂購及公開發售後迅即被掃光，一票難求。今日（22日）宣布加開12月21日及22日兩場。
對於連加兩場，阿Sa及阿嬌表示希望「夠數還飛債」。這次Sidetrack演唱會，顧名思義會唱一些平時較少於台上演唱的「滄海遺珠」，現階段唱回這些歌，二人坦言感覺一定會有不同，特別是早期的歌曲，「當時嘅聲線仲係好幼嫩！例如《百試不厭》、《有所不知》，其實每一首歌一去到個台度，每一次唱都會有唔同嘅感覺，係好神奇嘅！有啲歌以前唔係太大感覺 ，而家聽番覺得『乜原來呢首歌咁好聽！』例如《加油》，而有啲歌永遠唱嘅時候都會眼濕濕，例如《友誼第一》。」
至於最想觀眾帶走的是歡樂，「我哋最希望每一次嘅演唱會都係可以俾到觀眾一個開心、放鬆、可以忘記平時生活壓力嘅一個時間同空間，而且呢個氛圍係雙向嘅，大部分時間都唔係淨係我哋帶俾大家，因為通常入得場睇我哋演唱會嘅觀眾，都係好歡樂。」
