江美儀、吳業坤（坤哥）、曾展望（GM）及朱敏瀚（朱仔）昨日出席無綫節目《試真D唷》記者會，而今輯有份拍攝的張振朗則未有現身。台上江美儀更大爆去台灣拍攝期間被GM弄壞了拍攝用的腳架，知衰的GM即時向她道歉。
會後，美儀姐與坤哥及GM一同受訪。被問到可有被兩位男拍檔激怒，她搞笑說：「我本來瘦，但因為谷氣，谷到個人漲咗，拍咗兩轉，我就忍咗十幾日。」她又爆料GM愛拗頸又邋遢：「佢永遠持相反意見，又唔講對唔住，仲有次見到架車滿地稿，又好多垃圾，要我執乾淨。GM仲整爛咗我用嚟拍攝嘅腳架，仲要未問我意見，就送咗個唔係我心水嘅腳架畀我。」GM即時認衰，承認不應與美儀持相反意見，但談到亂丟垃圾問題，他一臉委屈說：「未必係我嘅，不過就算係咪我，我都應該執返好啲稿，我就係唔夠責任感。」
之後，美儀姐又爆料幾位男拍檔每晚都不跟大隊返酒店。她知道坤哥是為節目到酒吧考察，但就不滿未有預她一份：「佢哋永遠唔會叫埋我去，因為要去搵食，第二日就好虛。嗰度啲炸雞係好食，但唔會叫畀我食。」坤哥則解釋因工作時間長，晚上要放鬆，每晚要食4隻雞。他自爆身形肥了不少，現時重75公斤，連太太都指他似大叔，因此要努力減肥。
在眾男拍檔中，美儀姐就大讚朱仔令她最開心，影合照時更要來個擁抱。至於新加入的張振朗，她則讚對方夠醒目，懂得「棄暗投明」。
