莊子璇谷胸上陣，睇到粉絲嘩嘩聲。
魔音女團MYNT推出首支MV，6位成員以性感戰衣上陣，大晒長腿與纖腰！當中以莊子璇最為吸睛，對住鏡頭施展迷人電眼，宋宛穎與倪樂琳亦不遑多讓，後者更瞓上枱瘋狂擺甫士，成功搶回不少焦點。各人上演失控戲碼，扑爛玻璃狂掟碟，簡直玩到癲！
由無綫大型跳唱節目《魔音女團》打造的全新女子組合MYNT推出首支歌曲《Turn My Magic On》，MV昨日首播，6位成員宋宛穎、倪嘉雯、莊子璇、倪樂琳、喬美莎與盧映彤以多套性感戰衣亮相，大晒長腿、纖腰及美人肩，完美曲線盡現人前。莊子璇身兼服裝設計，她受訪時表示：「今次好開心用咗我設計嗰套衫，因為本身諗住大家可能着一、兩次已經冇機會再着，或者大家都好鍾意呢套衫，所以就用咗喺MV裏面。」
奉旨發爛渣
舞蹈方面，各成員施展渾身解數，除了力度十足的揈頭動作、細膩利落的手部動作外，更融入大量Body Wave，充分展現柔韌度與肢體控制，加上豐富表情，舉手投足都散發魅力。其中以莊子璇趴長枱及倒酒的動作最為吸睛，她不時對着鏡頭施展迷人電眼，誘惑度十足；隊長宋宛穎擺甫士得心應手，同樣電力驚人；至於倪樂琳躺在長枱上，邊唱邊做動作，魅惑度爆燈，她直言：「其實喺枱上嘅甫士，大部分時間都係我臨時Freestyle諗出嚟嘅，嗰刻突然諗到想做咩甫士就做。」
盧映彤則對着圓鏡大玩「鏡中戲」，表情豐富，向來以K-Pop偶像為榜樣的她喜歡邊看邊模仿，從而練成「表情管理」，難怪拍攝時表現自然。MYNT除了在MV中大晒舞技與性感造型外，更上演一場盡情搞破壞的戲碼，6人將枱上的碟、玻璃樽、紅酒杯等統統「扑爛掟爛」，地上滿布碎片，一片狼藉。莊子璇、倪樂琳和盧映彤都對這一幕印象深刻：「未試過咁樣釋放我哋嘅天性，嗰刻心情好開心，將所有唔開心壓力抒發晒，整個拍攝過程相當痛快。」
倪樂琳瞓枱Chok甫，自信爆棚，但原來是臨場發揮！
