高海寧近年事業當旺，工作不斷，難怪冇時間諗感情事。 高海寧近年事業當旺，工作不斷，難怪冇時間諗感情事。
高海寧近年事業當旺，工作不斷，難怪冇時間諗感情事。
無綫花旦高海寧（高Ling）事業穩步上揚，惟曾因身材出眾而被定義為「唔係好女仔」，令她一度沮喪，如今終於看開，專注工作冀望對得起支持者。雖然近年在愛情上交白卷，但她慶幸從未遇上渣男，全因一直銘記家訓「帶眼識人」，她揚言不追求剎那激情，只在乎長久關係，若愛情來了，不排除成為人妻！
高海寧在現時熱播無綫劇集《夫妻的博弈》中，角色命途多舛，慘被老公及閨密雙重出賣，更經歷癌症及撞車，其後獲得重生機會而改寫命運。劇中經歷坎坷，幸而高Ling現實中從未遇人不淑，她說：「所有以前嘅男友喺相處過程中都好錫我，冇人係渣男。（冇遇過第三者？）我還好，希望將來都唔會遇到。（揀男友眼光唔錯？）主要係我拍拖次數唔多，只係得兩個。」她指從小聽從爸爸所教「聽其言不如觀其行」，會花長時間了解對方，不相信一見鍾情：「所謂一見鍾情只係好感，但唔足以令我因為咁而好愛佢。我唔係戀愛腦，好理智，好鍾意分析，我睇好多心理學嘅書。」跟揀男友一樣，高Ling交友同樣挑剔，要闖入其內心世界並非易事，直言好朋友10隻手指數得晒。
縱然未曾被身邊親友背叛，高Ling卻對劇中角色被貶低及輕視的遭遇感同身受：「有段時間比較難過，覺得自己不被理解，無論我點努力，大家只係集中喺靚、花瓶同身材上面，例如我嘅戀愛經歷唔多，但有人會覺得我唔係幾好嘅女仔，咁唔止係質疑我嘅人格，亦係質疑我屋企嘅家教，我嘅家庭教育係幾好，價值觀同待人處事都係來自我嘅家庭，當大家對我有呢個質疑，我會幾唔開心。（點解對你有誤解？）身材好同性感嘅女仔就會畀人覺得唔好，呢個係刻板印象。」她稱現時已看開，與其聚焦在負評上，倒不如將焦點放在欣賞自己的人身上。
視佘詩曼為目標
高Ling靠實力成功撕下「花瓶」標籤，2023年憑劇集《新聞女王》「許詩晴」一角拿下「最佳女配角」獎，演技獲認可，更憑此人氣角色孭飛之後開拍的新劇《新聞官許詩晴》。明年踏入4字頭的她，被問到下一步是否劍指視后？她坦言害怕期待落空，因此從不執着於獎項：「依家接每個作品，只會諗點樣演好個角色，對得住我攞過嘅獎，唔好退步。」同時視佘詩曼為目標：「希望好似佢咁，凝聚到一班人為劇集努力，好有個人魅力。佢真係好努力，為咗令大家投入啲，會事先同大家傾偈，記住每個人嘅名，做好情感上嘅連繫，唔止係顧住自己嘅角色，而係整場戲同所有演員。」談到近年不少藝人離巢無綫外闖，高Ling不諱言曾萌生「退圈」的念頭：「有計劃過去讀書，我對心理學好感興趣，亦覺得自己有共情能力，我經歷過情緒困擾，又走到出嚟，所以好希望幫到人。」
相比事業，高Ling的感情生活顯得乏善可陳，她表示認識一個人需要很長時間，但正處於事業上升期的她，偏偏最缺時間：「有朋友話要介紹男仔畀我，我叫佢唔好住，遲啲先，等我冇咁忙嘅時候。我真係好忙，而且個腦長期都係記工作，冇時間去思考同感受其他。（你永遠都冇時間！）又或者咁講，我好信Timing，遇到就遇到。（距離上次分手至今有冇拍過拖？）有認識過人，但最後唔啱。」講到擇偶條件，她渴望穩定的關係，不喜歡曖昧拉扯：「激情只係一瞬間，希望大家嘅價值觀相同，可以分享各自內心，先可以細水長流。（會唔會喺事業高峰期結婚？）唔知㗎，可能會！」
