【Emily】管數60載 103歲財務經理堅持返工 首間餐廳廚房後倉庫做起 美心最年長員工

龐姑娘嘅故事噚日傳出後引起網民熱議，有人話值得尊敬，有人擔心龐姑娘身體。亦有網民講笑話，記得美心創辦人伍沾德長女伍淑清2019年反修例運動時講過要「放棄年輕人」。

銀髮退而不休 美心一成員工逾60歲

美心、尊賢會同聖公會福利協會上月27日舉辦「萬歲飲茶O2O」活動，邀請多位服務超過五六十年嘅美心員工同250位護老院長者一齊飲茶。美心話現有2萬名香港員工，近半40歲以下，11%即約2500人60歲以上，28人70歲以上。美心指唔少員工服務逾30、40年，到退休年齡仲想繼續發展所長，所以安排退休員工可以合約或兼職形式留任原本崗位。