【時報訊】民主派初選案被告之一、東區前區議員李予信噚日參加國際街舞賽事「R16」嘅香港資格賽，同團隊奪得冠軍，可代表香港喺8月去韓國參加決賽。佢話能否踏上國際舞台仲係未知之數，但參賽經歷令佢明白真誠創作嘅力量，「讓我們一起繼續在不同領域努力，真誠地、好好地代表香港」。
「R16」為年度國際街舞賽事，今年有來自19個國家或地區嘅代表角逐。李予信喺facebook話，同團隊勝出資格賽，將可以代表香港參加決賽。不過，佢因為初選案被控國安法嘅串謀顛覆國家政權罪，單案仲未裁決，唔知係咪可以出戰8月嘅決賽。
李予信學街舞超過10年，舊年曾獲提名競逐香港舞蹈年獎。今次有資格代表香港參加國際賽，佢話一直思索「到底何謂香港風格」，近年因為人生同社會磨練下嘅反思，令佢發現以舞蹈創作代表香港，其實存在好多可能性，希望大家繼續喺唔同領域好好代表香港。
