【時報訊】立法會前日討論由民建聯陳仲尼提出嘅議員議案，促請政府進一步鞏固香港國際化優勢，新民黨主席葉劉淑儀發言時，建議政府官員加強同外媒交流。不過，喺2017年退出新民黨嘅實政圓桌召集人田北辰噚日就喺facebook發帖，唔點名話相關建議「有啲離地」，但絕對同意「嗰位議員」話，政府喺提升及鞏固香港嘅國際優勢上係責無旁貸。
話外媒有預設立場 篩選訪問內容
田北辰話，根據佢多次接受外媒訪問嘅經驗，發覺好多外媒已有立場，喺預設結果嘅前提下問佢哋想問嘅問題，更甚係有好多訪問內容「被消失」，「所以呢位議員嘅建議，講就容易兼好聽，可行性同埋成效有幾大，大家都心知肚明啦！」
至於點樣鞏固香港嘅國際化優勢，田北辰話有啲睇法，佢話近年因種種因素，香港作為「國際大都會」嘅優勢逐漸消失緊，而目前外企外商最擔心係內地經濟等政策變化比較大，變成有好多「不確定性」同「未能預知性」，反而香港至今保持到「確定性」同「可預知性」，認為香港應該繼續保持同加強呢方面優勢，以加強外商信心，亦變相令到一啲有立場嘅外媒「啞火」。
