【時報訊】香港專業教育學院 （IVE）青衣院校前日舉辦分享會，邀請咗藝人林家棟同李佳芯向學生分享事業發展經歷，佢哋亦參觀咗學院嘅「智慧城市創新中心」。不過有網民發現「智慧城市創新中心」先後兩次喺facebook上載活動照片，但第二次嘅大合照中，李佳芯「被消失」，之後更刪帖，質疑院校有欠尊重。事件喺網上廣傳後，IVE（青衣）噚日下午都上載番活動花絮，見到李佳芯向同學分享嘅情况，並提及「很高興有李佳芯小姐作為我們的神秘嘉賓」。
職業訓練局回覆本報查詢時無證實或否認係咪有「P圖」執走李佳芯，只話青衣院校邀請咗林家棟及李佳芯擔任主講嘉賓，院校「亦得悉未有就公布活動訊息的安排詳細溝通，導致引起不必要的誤會」，會總結經驗完善日後活動安排。李佳芯就回覆本報話，今次係獲邀去分享，對院校點樣發帖同照片並唔清楚。
翻查資料，李佳芯喺2019年6月經Instagram呼籲公眾登記做選民，當時惹嚟唔少內地網民抨擊同抵制，佢事後回應時強調「港獨」二字從來無喺佢嘅腦海或心裏出現。去年底有內地平台轉播無綫節目時，就將佢嘅身影「打格」處理。
