【時報訊】文化體育及旅遊局長楊潤雄噚日喺facebook發文，話3月除咗係藝術月，亦係香港郵輪旅遊最熱鬧嘅月份，成個月有20艘郵輪訪港，提供33個航次同帶嚟10萬人次嘅郵輪旅客；佢並到訪啟德郵輪碼頭，觀察兩艘郵輪嘅運作情况，包括以香港為母港嘅德國郵輪Mein Schiff 5，同埋第一次來港、正展開環遊世界航程嘅Serenade of the Seas，其間同旅客傾偈交流。
睇番船期表，噚日有4艘郵輪喺香港過夜，有兩艘泊喺啟德郵輪碼頭，其中Mein Schiff停泊一日半後今日傍晚6點半離開，Mein Schiff 5就逗留兩日半至聽晚7點再起行。另外兩艘就停喺尖沙嘴海運碼頭，包括阿塔尼亞號郵輪（Artania）及奧德薩號（Seabourn Odyssey），佢哋分別會喺今日傍晚同午夜前離開。
楊潤雄話，有郵輪旅客同佢講，期待感受香港中西文化融合嘅獨特氣息。佢話會持續監察營運商工作，知道碼頭營運商、郵輪公司、交通服務營運商同旅行代理商有「量身訂造」規劃，安排咗多種唔同嘅交通選擇，方便旅客去景點同目的地，旅客普遍對碼頭交通安排感到滿意。
