【時報訊】本身係生物科學家嘅中文大學校長段崇智平時多講科研或大學發展，噚日佢就搞搞新意思，同佛教聯合會會長、西方寺方丈寬運法師來一場對話，由科學倫理、安樂死、人工受孕到宗教都有講到。
談唔同宗教關係 方丈：香港最包容
主持問兩人，做實驗用白老鼠會唔會「殺生」，笑問會唔會「落地獄」？段校長話，大部分科學家都唔覺得動物比人低等，只係為醫學或研究藥醫病，無可避免要犧牲，的確有矛盾。不過佢話，科學界自1960年代已提倡實驗技術道德，減少使用動物，近年有幹細胞培養器官組織，相信再過10年技術可成熟，「殺生無法避免，但將來很樂觀」。比較爭議大嘅安樂死，校長就無直接表態。
寬運法師就話，殺生確係罪過，但要睇係咪為做實驗犧牲，最後有無用得其所。佢形容，幹細胞技術將來成熟，就可盡量將動物由痛苦中解除。
至於唔同宗教之間關係，寬運法師話香港最包容，六大宗教定期對話，「一個中國、各自表達一樣」。信基督教嘅「段爸」話，不同宗教都有相近地方，一隻手鬧人、3隻手指指番自己，同時基督教教人要寬恕，每個人都有原罪，人無完人，為自己嘅罪悔改，然後得到赦免。
