【時報訊】有網民噚日喺facebook話，今個月16號同家人搭國泰CX138航班商務客位由悉尼返港，家人食飛機餐嘅沙律時食到一隻完整大飛蛾，令佢作嘔又胃痛，打後兩日都食唔落飯。該網民話，空中服務經理承諾48小時內會聯絡佢哋跟進同交代，但佢一直等咗超過一個星期都無收到回應，批評國泰服務「一落千丈」，希望管理層正視。
該帖引起唔少關注，有人話隻碗同張枱唔似國泰商務艙，又有人質疑係咪想搵着數，不過都有其他網民喺留言貼出相片，話見過國泰飛機餐有爛提子，甚至塑膠粒。國泰航空回覆Emily話，知悉事件後已安排同事與顧客聯絡，國泰正就事件詳細調查，再次為受影響顧客衷心致歉。
