【時報訊】大角嘴海輝道遊樂空間噚日起開放畀公眾使用。空間由渠務署現有渠務設施上蓋優化而成，設跳牀、輪胎形大韆鞦、雙人兒童韆鞦、搖搖板等玩樂設施。Emily噚日見到唔少路過長者試玩上肢訓練器、橢圓機及健身單車，3台運動裝置都設有電子顯示屏及人力驅動嘅無線充電，亦可做阻力調整。
住喺附近嘅鄧先生話，想帶喺屋企溫書嘅孫仔出外休息吓，去到海濱散步發現公園「開張」，覺得設施新穎有趣，為公眾提供休憩空間，會再帶孫仔去玩，美中不足係附近無廁所，但佢都希望政府之後會有類似嘅優化計劃。
根據渠務署資料，遊樂空間佔地約800平方米，設有兒童遊樂和健身設施，包括戶外管鐘、彈牀、親子鞦韆、搖搖板、健身單車和訓練器，部分設施採用共融和寵物友善設計，並設有涼亭和綠化地區，木椅就以由工務部門收集嘅移除樹木加工而成嘅再生木製成。
