【時報訊】民建聯領導層去年換屆後，早前精簡內部架構，噚日與傳媒茶敘講未來計劃。副秘書長葉文斌話，該黨將更積極善用社交媒體，分享區議員日常工作及社區「好人好事」，並正考慮開設「小紅書」帳戶；民建聯亦會加強內部培訓，包括區議員助理等職員目標每年到內地至少受訓一次。
葉文斌話，內部正討論開設小紅書帳戶，加強經營社交媒體。對於用家多數為內地人，佢話可以善用平台「說好香港故事」，例如由各區議員分享所屬社區特色等。
民建聯副主席陳學鋒就話會加強內部培訓，包括邀請學者、專家舉行「學習講堂」，定期辦國情班。佢表示，培訓對象除咗黨內議員、社區幹事等，亦包括區議員助理等，黨內將會有系統地記錄受訓成員表現，如參與討論程度、反應是否敏捷等。佢話長遠希望推薦更多人才加入政府及諮詢架構，到時就會提供成員表現予政府參考。
民記早前宣布成立公務員紀律部隊政策小組，副主席葛珮帆話小組已展開工作，首階段會約見各公務員工會，強調小組唔止為公僕爭取福利，亦會以改善政府服務、吸引新血加入公務員為目標。
