【時報訊】特首之前提到完成23條立法「早一日得一日」，處理立法嘅立法會法案委員會亦分秒必爭，噚日下晝4點左右完成逐條審議，今朝9點將再開會討論修正案。委員會主席廖長江就同律政司人員「講數」，要官員噚晚9點向立法會呈交修正案中英文文本，搞到律政司人員一臉困擾。
廖長江噚日下晝就問政府，需唔需要多少少時間搞修正案文件。保安局副秘書長廖李可期話，基本上修正案嘅中文稿大部分做起咗，英文稿就需要多少少時間，廖長江建議中英版本一併提交，仲問可唔可以即晚9點前交到。
距離晚上9點其實只有幾個鐘，廖太回應話「我哋盡量做」，但廖長江就話，留意到同場律政司草擬科代表表情，問「你好似有啲困擾，草擬科O唔OK啊？」署理副法律草擬專員黃安敏答「會盡力」。廖太就再嘗試爭取話：「（午夜）12點前啦。」
不過廖長江並冇批准，話因為預計今朝9點要開會審議修正案，要官員早啲交文件，議員先可以睇完文件開會，形容咁樣比較妥當，堅持要官員噚晚9點左右趕起文件，「咁樣做得唔得？」廖太同黃安敏無奈最終一齊點頭答允。
