【Emily】啟德體育園主場館幻彩外牆竣工

【時報訊】預計今年底竣工嘅啟德體育園主場館，噚日完成安裝外牆所有面板，相信唔少人近期喺港九海旁都有機會見到，而體育園嘅建造工程基本完成約八成半，整個項目工程進入最後施工階段，並於2025年啟用，將會用作舉辦不同大型體育及娛樂節目，當中包括由廣東、香港同澳門共同承辦嘅第15屆全國運動會。

體育園佔地28公頃，其中主場館採用開合式上蓋設計，可容納5萬座位，設計主調為「東方之珠」，用咗大約2.7萬塊不同形狀嘅三角形鋁板組成，排列出多層立面，外牆嘅顏色隨光線切入角度變化而轉變，呈現藍色、紫色和銀色等多種色彩。園內另有一個可容納5000座位嘅運動場。

啟德體育園於2019年開始動工，原定去年完工，但受到新冠疫情影響推遲落成。至於今次完成安裝嘅三角面板，安裝前都經過多次修正同調整尺寸等，睇番體育園上載到YouTube嘅短片，每塊面板都係由工人坐吊船運載及安裝，成個安裝工程歷時約8個月。