【時報訊】政府成立關愛隊後，地區事無大小都話搵關愛隊幫手，最新一張工作單，係幫手拎啲指定垃圾袋派畀街坊，協助環保署向街坊宣傳延後至8月實施嘅垃圾收費計劃。為協助關愛隊掌握垃圾收費安排，等佢哋再向街坊講解，環保署搞咗3場簡介會畀關愛隊代表，日子分別係今日（20日）、29日及3月6日，而民政處已向關愛隊發出邀請。
本身係佐敦谷關愛隊成員嘅立法會議員顏汶羽同Emily講，佢哋近日已收到通知，叫關愛隊去領取600個指定膠袋、300張傳單，要求佢哋幫手落區宣傳，但究竟點樣向街坊派發，係派畀街坊用還是用嚟向街坊展示宣傳，暫未知道。佢話關愛隊職能包括幫政府解說政策，所以都要接單照做。
政府原定4月實施垃圾收費，其後延遲至8月推行，以爭取更多時間籌備。顏汶羽就話，大家都知道推行垃圾收費，要先解決大量配套問題，例如應該要有更多就腳方便嘅「綠在區區」回收站，但𠵱家回收站數量唔夠。佢又話現時部分屋邨有廚餘回收機，但啱啱嘅農曆新年假期，有街坊反映廚餘回收機爆滿，街坊打電話搵環保署，署方就話係回收商責任，會搵回收商跟進。
