【時報訊】青山醫院設精神健康體驗館，希望畀市民認識精神病，消除誤解，並對患者更有同理心。體驗館早前已開放畀公眾喺網上預約免費參觀，政府新聞網近日走訪參觀過嘅同學，中六生陳毅琛話佢原本對精神病唔多了解，「親歷其境」後較能明白患者發病時嘅感覺。
陳同學講緊嘅係體驗館內嘅「徵狀體驗室」，參觀者可感受患者嘅視、聽、觸幻覺。同樣讀中六嘅何衍蔓也感受甚深，話體驗後得知患者視覺、聽覺等都受影響，令精神繃緊，會持續緊張同擔心，「我知道佢哋（患者）嘅病會影響生活，但無想到影響咁嚴重」。
由精神病康復者擔任嘅朋輩支援員亦會同參觀者分享自身故事。如Jecko曾患思覺失調，20幾年前發病，出現幻聽，常於屋企「聽」到樓上有好大搓膠袋聲甚至打樁聲，又受視幻覺困擾，最深刻係「睇見」人頭從抽濕機冒出嚟。
Jecko話身邊人嘅關心鼓勵好大幫助，但有時會「好心做壞事」，因關心而「每事問」令佢反感，故佢建議親友唔好否定患者嘅感受，「例如患者提及一啲病徵，如果對方話無可能、唔存在、係幻想出嚟嘅，可能會令患者抗拒，最終咩都不敢同人分享」。佢話經求醫同食藥，情况改善咗。
