【時報訊】政府副局長、政治助理一行逾30人，噚日浩浩蕩蕩北上學習國情。率團嘅特首辦主任葉文娟期望透過研修，日後大家工作時可以國家觀、國際觀同大局觀作周全考慮。律政司長政治助理洪曉敬亦話，北上學習機會非常寶貴，可以令佢哋「站得更高」，以更開闊眼光了解國家發展同大局，落實良政善治。
「政治委任官員國家事務研修班」噚日出發，人數規模係歷年最大。葉文娟被問及咁多政治問責官員一齊離港，點樣處理本港工作時，佢話大家雖然身不在港，但心繫香港，與公務員團隊緊密聯繫處理公務。至於今次會唔會獲國務院港澳辦主任夏寶龍接見，葉文娟話拜會港澳辦領導將是重要學習一部分，具體由港澳辦安排。
葉文娟又特別提及，今次特別為團隊製作咗一個紫荊花徽章，形容盛放嘅紫荊花代表希望香港欣欣向榮，希望更能顯示團隊精神。佢哋抵達北京後，會喺國家行政學院學習，23日（周四）將去江蘇省考察，25日（周六）返港。
