香港日本料理店協會呢個周末一連兩日會喺維園舉辦「舞吧！秋祭！」，活動涵蓋日本食品、試穿浴衣及各縣觀光宣傳等。圖為去年喺中環PMQ元創方舉辦「舞吧！秋祭！」推廣日本食物嘅情况。（日本駐港總領事館facebook圖片）
【時報訊】唔少鍾意遊日嘅港人都會參與當地嘅祭典，聽日（周六）起一連兩日，香港日本料理店協會會喺維園足球場舉辦名為「舞吧！秋祭！」嘅秋季祭典，希望加深港日兩地友誼，及提高市民認識日本美食同文化。Emily聽聞日本駐港總領事岡田健一會喺活動第一日到場「應援」𠻹。
體驗「盆踊」 送5000份帆立貝
祭典設有超過20個攤位，涵蓋日本美食、試穿浴衣同各縣觀光宣傳等。主辦方除咗安排咗日本傳統舞踊「若柳流」同埋傳統音樂「津輕三味線」等表演，仲會邀請參加者體驗「盆踊」，由領舞者帶領，圍繞場中嘅「櫓」重複做簡單嘅動作。作為日本傳統節日「盆節」嘅重要活動，「盆踊」有近600年歷史，仲獲當地政府列為重要無形民俗文化遺產。
主辦方話，會場會以花燈裝飾，等參加者有置身日本嘅感覺，又話兩日祭典準備咗5000份帆立貝，送畀著浴衣同角色扮演（cosplay）到場人士、又或者讚好相關facebook嘅參與者。
相關字詞﹕日本駐港總領事館 祭典 香港日本料理店協會
免责声明：本文仅代表作者个人观点，与华侨网无关联。其原创性及文中陈诉内容未经本网证实，对本文内容、文字的完整、真实性，以及时效性本网部作任何承诺，请读者自行核实相关内容。如发现稿件侵权，或作者无意愿在华侨网发布文章，请版权拥有者通知华侨网处理。
