【時報訊】杭州亞運前日閉幕，港隊奪8金16銀29銅共53面獎牌，名列獎牌榜第12位，其中本港多間大學有學生運動員及校友參賽，攞咗2金8銀22銅共32面獎牌（見表）。7間大學喺賽事期間都有喺facebook出post祝賀學生及校友攞牌，中大噚日就喺fb總結亞運成績，話今屆有53個學生及校友參賽，其中10人攞到2銀6銅佳績，包括正修讀法律博士課程嘅江旻憓，佢喺女子重劍團體賽摘銀，而校友李嘉兒同湯芷穎就奪得女子壁球團體賽銀牌。
浸大1金2銀3銅 中大2銀6銅
有49個學生及校友出戰亞運嘅教大就奪得1金2銀6銅，係奪牌最多嘅院校，包括為本港奪得首面金牌嘅男子雙人單槳無舵艇選手、修讀健康教育榮譽學士課程嘅林新棟同王瑋駿；同樣修讀健康教育榮譽學士課程嘅李思穎就分別喺場地單車女子麥迪遜、女子全能賽、女子團體追逐賽奪2銀1銅。
有3個學生及校友出戰嘅科大就有工程系學生伍泰龍奪得三項鐵人混合接力賽銅牌，不過EMILY暫時未見科大有喺fb有出post祝賀佢。
