【時報訊】世紀暴雨導致石澳道面臨山泥傾瀉和塌路，當區陸路出行大受影響，政府喺石澳後灘搭建臨時浮橋供市民經水路撤離及提供物資，而石澳道噚日已開通。Emily同事去到觀察，發現當局已經搭建一條新嘅橙色浮橋，並吸引唔少大人細路到場「打卡」，成為石澳「新景點」。此外，有市民喺浮橋上釣魚。
石澳道經搶修後已經重開，市民目前可乘搭巴士出入，原用作撤離市民嘅浮橋變成當區居民「新去處」。記者所見，除小朋友外，唔少大人嚟到自拍，及一嘗踩浮橋滋味，其中有一名男子準備充足，帶埋魚絲釣魚。
陸路已通 「唔知條橋有咩用」
有居民就反映，由於陸路已開通，「唔係好知政府新搭條橋有咩用」，認為「this government (is) so funny」。嗰名居民仲話，過嚟睇浮橋主要係「笑吓」同「開心吓」。
石澳沙灘受暴雨洗禮後一片狼藉，甚至有豬屍，但仍有零星內地客到嚟打卡，並擺唔同「甫士」，可見沙灘魅力不減。
政府噚日舉行記者會，有傳媒都問，政府前日幫手撤走石澳居民，但其實接住就已打通石澳道通車。政務司長陳國基話，政府做這一切工作，都係希望協助該處居民唔使「與世隔絕」，盡快畀居民恢復正常生活。
