【時報訊】上任超過一年半嘅立法會法律界議員林新強，其首個議員辦事處噚日開幕，佢致辭時講笑話，揀喺元朗開辦事處一來自己係新界人，二來係被中聯辦法律部「提點」要開辦事處。佢補充，其實議辦上年9月開始服務，但當時議辦前面整路，所以一直無舉行開幕儀式，強調自己會履行憲法責任，多為市民服務。
林新強話雖然自己係法律界代表，但都會更「貼地」了解市民需要，又話已經聯繫唔少元朗區嘅律師事務所，將會為市民提供法律服務。
元朗議辦開幕 搵律師樓幫街坊
本報日前報道唔少議員缺席法案表決，出席率近半嘅林新強解釋，議員平日事務繁忙，開會期間要處理其他事務，可能錯過法案嘅表決時間。但佢認為表決法案係議員責任，有傳媒監督立法會亦係好事，仲話之前有啲議員懶，走咗去無返議事廳撳鐘投票，相信佢哋經過今次事件後都會「檢點啲」。
