【時報訊】紀律部隊近年面對招聘困難，繼警務處、海關同消防處放寬投考資格同要求，懲教署噚日亦宣布，由9月16日開始，懲教主任同二級懲教助理嘅入職體能測試項目會由5樣減至4樣，穿梭跑次數亦會減少。
懲教署話，新嘅體能測試項目會由5樣減至4樣，包括用靜態肌力測試代替sit-up同埋立地向上直跳，仲將穿梭跑由9米乘10次，改為10米乘4次。原本嘅「俯撐取放」同800米跑就會保留。翻查資料，2022/23年度懲教署空缺率係10.1%。
署方：委專家檢討 更適合現工作
懲教署話，佢哋𠵱家嘅體能測試項目同標準已經用咗差唔多20年，早前委託運動醫學專家幫手檢討，制訂更加適合𠵱家懲教人員工作需要嘅體能要求。
署方近月仲將體能測試、《基本法》及《港區國安法》測試、小組面試同遴選面試由兩日縮短到一日完成。署方話會繼續積極舉辦唔同類型嘅招募活動，包括入職講座、工作坊、展覽及到大灣區嘅大學搞招聘會等，吸引多啲人投身懲教工作。
