【時報訊】賽馬會AR藝術教育計劃最近喺中環「大館」舉行展覽，展出28件由中學生原創嘅3D AR（擴增實境）藝術作品，主要同本地歷史及文化有關，AR模型取材自冰室、「打小人」文化等，展期至8月28日。市民用手機App掃描散落大館6個位置嘅標誌，可以喺實境添加AR模型，仲可以同佢哋「打卡」互動。
有來自8間中學過百名學生參加計劃，由聖保祿學校學生構思製成嘅AR模型「利魂繞」，靈感來自鵝頸橋「打小人」文化，學生陳心喬話，模型正面係關公拎住拖鞋嘅正義形象，反面係拖鞋貼住100蚊價錢牌，希望反映「打小人」喺商業化下嘅兩面。市民仲可以扮演打人同被打嘅角色影相。為令大家有更大代入感，學生選擇將「利魂繞」擺喺大館建築嘅橋底，切合鵝頸橋偏窄同暗嘅氛圍。
AR模型「冰室訪客」就重構冰室嘅枱櫈佈局，仲有一個綠色皮膚嘅外星人拎住菠蘿包，負責項目嘅聖伯多祿中學學生李英偉話靈感來自華富邨UFO都市傳說，而選擇喺大館檢閱廣場展出係因為嗰度西餐廳多，希望畀市民感受到唔同年代餐廳格局嘅對比。
