【時報訊】政府新聞處開設嘅「政府禮品店」噚日「開張」，實體店喺金鐘政府總部東翼一樓，畀政總職員同訪客選購，一般市民有興趣都可以去網上店訂購，而署理特首陳國基、署理財政司長黃偉綸、政務司副司長卓永興噚日率先去shopping。
實體店只招待職員訪客
陳國基卓永興黃偉綸率先幫襯
陳國基話買咗一組茶具套裝同兩組碗碟套裝。Emily上網睇過，1個茶壺連6個茶杯嘅茶具套裝印有特區區徽，賣1688蚊。至於卓永興除咗買咗碗碟四人套裝外，都買咗4隻香港景點嘅瓷杯送畀同事，又買咗本特區區徽筆記本同彩虹布袋自用。黃偉綸就「慳家」啲，暫時買住一套餐具同一隻熊仔先。
除咗一系列印有特區區旗、區徽嘅產品，禮品店亦有以香港風景、旅遊景點設計嘅產品等，仲有唔少紀律部隊紀念品，例如救護熊、警犬拉布拉多公仔。
