【時報訊】獲市區更新基金撥款8000萬元、全港最長嘅主題步行徑——九龍城主題步行徑「躍變．龍城」噚日舉行揭幕禮。發展局長甯漢豪致辭時話，市區更新唔淨止係將老舊嘅樓宇拆卸重建，同時亦活化舊區，為舊區注入新動力，而九龍城主題步行徑作為市區更新計劃嘅重點項目之一，更加係集歷史、文化、自然、體驗和娛樂於一體。
市區更新基金董事會主席倪錫欽話，九龍城步行徑係基金成立至今歷時最長、撥款最多嘅項目。經歷近6年，步行徑硬件工程竣工，全長超過6.5公里，北起九龍城寨城公園，南至紅磡聖母堂，串連九龍城、土瓜灣及紅磡嘅主要歷史文化建築及設施，仲有公共空間及交通節點。
負責設計及營運嘅香港聖公會福利協會話，過去步行徑舉辦超過760場活動，接觸近8.5萬人次。有份創作聲音故事「自己零用自己賺」嘅七旬老伯阿田就希望社會多啲關注九龍城，「咁多年累積落嚟嘅文物故事，冇人嚟欣賞，冇人嚟睇，慢慢就會消失啦！」
