【時報訊】全球新冠疫後復常，經濟學人智庫（EIU）噚日公布2023年全球宜居城市排名，香港升咗13位，喺173個城市入面排名61。奧地利維也納、丹麥哥本哈根分別蟬聯冠亞軍，墨爾本由第10升到第3位；大阪維持第10位，成為亞洲最宜居城市。
綜合嚟講，香港宜居指數獲得88.1分（最高100分），比上年高9.4分。EIU分析師接受CNBC訪問時話，由於防疫限制鬆綁，香港嘅生活質素同宜居度都大幅提升。
宜居指數由穩定度、醫療保健、文化及環境、教育、基建五方面評分，近期新上榜嘅城市之中，唔少係中國內地城市，大部分處於中游排名。EIU話，佢哋嘅醫療保健評分升咗，原因係醫保改革，嘗試令系統變得更公平。
隨住亞太區慢慢復常，排名升幅最大嘅頭10個城市多來自亞太區，如新西蘭惠靈頓躍升35名，去到第23位；吉隆坡都急升19名，排94位。另一邊廂，有啲西歐城市就無咁好彩，由於國內連串罷工示威，加上亞洲同中東地區急起直追，愛丁堡、倫敦、曼城、鹿特丹等城市排名都跌超過10名。
