【明報專訊】內地五一黃金周，大批內地旅客來港觀光，多名立法會議員就「逆流」北上，其中江玉歡（Doreen）就同外籍丈夫去上海同蘇州旅行。Doreen喺facebook話見到蘇州街頭有好多小販，但香港就將小販、霓虹燈等文化取締，感慨失去咗嘅文化用錢都買唔番。佢又話國安固然重要，但唔使「天天談國安」，要有開放同融和嘅環境，先可以令市民真正快樂。
話國安重要 但唔使「天天談」
政府近日推出「開心香港」，Doreen認為政府唔使凡事都要搞大型活動，因為雖花費大量人力物力但影響短暫，反建議推出長遠實際方案，例如仿效上海增設晚間及周末行人專用區刺激經濟，簡化食肆設戶外位置嘅申請程序等。
自由黨李鎮強坐船北上，去廣州欣賞廣州塔同珠江夜景，再坐高鐵返港，話要感受「一小時生活圈」。梁文廣同老婆去深圳行夜市，一嘗當地美食。
勞福局副局長何啟明、政助傅曉琳，同工聯會議員陸頌雄、郭偉强等人，都係去咗內地，但唔係玩，而係去清華大學深圳研究生院，參加清華大學嘅政務人才課程。其間何啟明忙裏偷閒，同前區議員任葆琳一齊踩單車。
