【明報專訊】港鐵前主席馬時亨雖然已係半退休狀態，但仍然百足咁多爪，又做公司非執董，又搞教育，近年仲做埋電視節目主持。佢舊年主持電視節目《馬時亨名人堂》，訪問多個政經界名人，節目播完後，佢話街上遇到唔少觀眾叫佢再接再厲，但係佢就耍手擰頭，事關要搵番咁有分量嘅政經名人實在唔易。直至有一日，佢喺街上碰到一個老伯，對方叫佢拍啲香港人故事，令佢靈機一觸，同電視節目製作人蕭潮順商量後，決定以口述歷史方式，以香港衣、食、行、音樂、電影做主題，講番香港喺唔同領域嘅故事。
馬時亨仲邀請咗唔同演藝圈名人包括張學友、張家輝、薛家燕、譚詠麟等，大爆當年內幕，呈現香港過去嘅民情趣事，佢自己就話好有可觀性同話題性。節目名稱叫《馬時亨‧香港情》，4月22日晚10點半喺TVB首播，之後更加想開拓內地巿場，希望透過節目「說好香港故事」。
