【Emily】央企/國企陳沛良教點樣分

【明報專訊】香港有唔少中資「央企」經營，不過到底「央企」同「國企」有咩分別？中國太平保險（香港）總經理、立法會選委界別議員陳沛良就教大家分辨，佢話「國企」主要分為兩類，由中央政府管理嘅稱為「央企」，地方政府管理嘅就係地方國企，所以「央企一定係國企，但國企唔一定係央企」。

陳沛良接受工聯會議員鄧家彪訪問，解釋央企通常規模較大，而且涉及重要戰略範疇，例如銀行、證券、石油、化工等，央企人事權亦由中央政府控制。陳沛良話，央企總部唔一定設於北京，華潤、招商局、中旅社、中國太平4間央企嘅總部都喺香港，其中中國太平係唯一一間以香港為總部嘅金融央企。

陳沛良關心青年發展，佢喺節目中話年輕人本質不壞，部分人受社會環境影響誤入歧途，認為社會應該畀機會佢哋。近年唔少青年移民，佢認為社會要為青年創造上流空間，例如置業、工作晉升等，年輕人先會願意留港發展。