【明報專訊】由新民黨李梓敬同工聯會陳穎欣兩個立法會議員等牽頭成立嘅「中國故事國際傳播聯盟」成立超過一年，噚日同傳媒茶敘，李梓敬預告今年會組織居港外國人到內地交流，計劃年中先去北京，有機會到訪中國環球電視網（CGTN），亦考慮緊帶外國人去新疆考察，「破除外國抹黑」。
中國故事聯盟加強招攬居港外國人
陳穎欣話聯盟過去一年有幾個新成員加入，未來亦計劃培養更多KOL「說好中國故事」。部分新成員包括新民黨議員陳家珮同何敬康、經民聯青委會副主席李超宇、公民力量發言人林宇星等。
李梓敬總結，聯盟成員喺「主戰場」Twitter嘅追蹤者總數超過11萬，其中佢嘅Twitter就有6萬，佢話數字多過部分身處海外嘅民主派。
李梓敬預告今年會組織居港嘅外國KOL到內地，全程拍片同埋訪問。聯盟成員亦會去瑞士日內瓦出席聯合國委員會會議，講述香港情况。至於本地活動，聯盟會邀請外國人參與「happy hour」，藉此招攬成員，又會舉辦英文影片同文章比賽，強調要以外國人聽得明嘅語言，去外國人常用嘅平台推廣中國。
