近日一張「迷因圖」喺網上瘋傳，主角並非別人，而係大家熟悉嘅宇宙最強甄子丹！當時嘅甄子丹仲未係葉師傅，非常年輕，身穿貼身白Tee同牛仔褲，雙手交叉翹在胸前，俊臉微微向上岳，嘴角微微向上揚，標題大大隻字寫住：「甄子丹冷傲退基佬 表明立場免惹麻煩」，仲有細字圖片說明：「認為女人可愛，絕不會喜歡男人。」
嘩，一睇就覺得張相係出土文物，唔知點解又會忽然大熱。呢幅迷因圖大受網民歡迎，皆因網民認為子丹當時嘅表情打扮「基味濃」，偏偏又雞乸咁大隻字「冷傲退基佬」，反差實在太大，笑爆嘴喎。仲話唔係人人翹埋雙手就有呢個效果，打扮、表情、文字，缺一不可！
正因為「冷傲退基佬」大受歡迎，網上湧現海量改圖，就連食環署都出咗幅「清潔龍冷傲退飢餓」改圖，企圖博君一粲。可能連甄子丹本人都意想不到，幾十年後一張迷因圖，竟然仲紅過葉問師傅！
所謂迷因，英文即係meme，係仿造gene（基因）所創造嘅字，咁即係乜啫？總之就係，喺社交網絡透過活潑有趣、有嘲諷揶揄意味嘅圖片，去吐槽一件嚴肅嘅事。後來又發展出迷因幣（Memecoin），即係源自網絡迷因、網絡表情包嘅加密貨幣。
嗱，美國總統特朗普同埋全球首富馬斯克就係箇中高手嘞。馬斯克2022年開始，持續發布關於狗狗幣嘅推文，早前加入政府效率部，同樣冇停過為狗狗幣做宣傳。特朗普仲犀利，第二次就職總統前3日，發行以自己為主題嘅迷因幣，唔使一日咋，幣值瘋漲至270億美元，發過豬頭呀！
