【時報訊】匯豐銀行慈善基金噚日宣布同惜食堂合作，推出「豐膳蜜蜜餸」社區計劃，支援獨居嘅基層長者。計劃會喺低收入社區設置自助提取機，畀基層長者領取速凍餐，期望3年內提供約90萬份。匯豐銀行兼匯豐銀行慈善基金主席王冬勝希望透過計劃動員社區各階層，推動關愛共融，打開獨居同隱蔽長者嘅心窗。
計劃會先為有需要長者登記，之後佢哋就可以用八達通喺自助提取機攞速凍餐，仲可以從餐單自由選擇，每日最多可以攞3份，啲速凍餐仲可保存5日添！首階段計劃會先喺觀塘、葵青同深水埗嘅公共屋邨試行，估計呢3區共有超過500個獨居長者居住，包括隱蔽長者。
長者亦可以透過外展服務領取速凍餐，400個義工包括匯豐義工同一批街坊會定期探訪獨居長者，送飯之餘，仲會同佢哋傾吓偈。
今次匯豐同惜食堂合作嘅膳食支援計劃為期3年，匯豐會撥款1億元支援弱勢社群，而「豐膳蜜蜜餸」就係計劃嘅一部分。匯豐仲計劃提升惜食堂製作速凍餐嘅產能，希望2026年累計產能可達720萬個，幫到更多有需要嘅人。
