【時報訊】市建局今日開始九龍城賈炳達道公園第一期嘅活化工程，預計工程於2027年中完成。市建局行政總監韋志成噚日喺網誌話，公園活化後會以「林間漫行」為主題，仲會重置同重新設計單車徑，利用公園原有高低地勢設特色架空單車徑，到時單車友可以體驗樹林穿梭樂趣。
韋志成話，重置嘅單車徑會採用單向循環設計，路闊會由現時嘅3米增至5米，兩旁欄杆會有1.5米高，轉彎位置欄杆高達2米；架空單車徑嘅地面空間會有遮蔭座椅畀市民休憩。
至於其他設施，佢話公園活化後會喺東面增設共享空間，同埋興建有蓋多用途廣場，可舉辦小型文娛活動；公園近東頭村道入口會新增一條連貫公園南北嘅架空瞭望步道，畀市民鳥瞰園林景色，及俯瞰九龍寨城公園。
韋志成話，活化賈炳達道公園工程要動用約7億元，工程涉及3.4萬平方米，將分兩期，首期分兩階段施工，將分別喺2025年底同2026年底完工；另今年上半年會展開衙前圍道/賈炳達道發展計劃嘅業權收購，未來6至7年要投放逾100億元。
